Bizkaiko Foru Aldundia ez ezik, Fundazio berriko patronatuan Bilboko Udala, Euskaltzaindia, Euskal Herriko Unibertsitatea eta Deustuko Unibertsitatea egongo dira.
Wiki Plaza: Wikipediak euskaraz lan egin, ikasi edota kontsultatzeko gunea izatea du helburu. Horretarako, datorren bi urteotan 46.000 sarreratik 70.000 sarrerara pasa nahiko genuke. Gure helburua euskarazko Wikipedian aurki daitezkeen sarrera kopurua areagotzea da, kultura eragile desberdinen arteko harremanak eta sinergiak bultzatuz.
Jakintza librea: AZKUE fundazioak Jakintza librea bultzatu nahi du. Hau da, euskarazko edukiak, hala nola musika, filmak, liburuak, argazkiak, datuak, zientifikoak, historikoak, edo beste edonolakoak libreki banatzea guztien eskura egon daitezen.
Jklik (ikas materiala): AZKUE Fundazioak euskarazko Jklik aplikazioak bildu eta zabalduko dituen gunea sortu nahi du sarean. Euskal irakasleei zuzendutako proiektua. Software honen bitartez irakasleek gai ezberdinak Internet eta ordenagailu bidez emateko aukera izango dute; hizki-sopa, gurutzegramak, testu ariketak edo asmakizunak. Momentu honetan lehenengo eta bigarren zikloan asko erabiltzen den “Clic 3.0” programaren garapena da.
Kaixo Frankie!: Kode librean dagoen jokoa euskaratu dugu eta gainera, Bilbo inguruan jokatzeko aukera izango duzu. Urtxintxa bihurriaren joko interaktiboa da honakoa; Getxo eta Bilboko hainbat gunetan dago kokatua. Jokalariek Frankieri bere bidean lagundu beharko diote, intxaurrak, giltzak eta bidean aurkitzen dituen bestelako elementuak jasoz eta bitartean, oztopoak gaindituz.
XUXEN Bizkaieraz: Dagoeneko martxan dagoen euskara zuzentzailea bizkaierara egokituko dugu. Bizkaieraz idatzitako testu zuzentzailea da. Helburu nagusia idatzizko bizkaiera estandarra bultzatzea da. Labayru, Eleka eta IXA ikerketa taldeak sortu dute, eta AZKUE fundazioak zabalduko du.
Euskararen Interpretazio Zentroa: Euskararen historia eta aniztasunari buruzko erakusketa elkarreragilea.
Mediategia: Orain arte euskaraz argitaratu den material guztiarekin artxibo multimedia bat osatzea da egitasmo honen xedea.
Unibertsitate liburutegia: Unibertsitateko irakaskuntzan eta ikerkuntzan erabiltzen diren argitalpenen bilduma osatu nahi da.
Geurea jaso eta zabalduz!: Gure hizkuntzaren aniztasuna jasoko duen Ahotsak.com ataria. Besteak beste, bizkaierazko grabaketak jasoko ditu.
Euskara bidaiari: Euskarak munduan duen presentzia bizia mapamundi elkarreragile baten bidez azaldu nahi izan da.
